ڪراچي پريس ڪلب ٻاهران جبري گمشدگين خلاف احتجاج دوران گرفتاري جون رپورٽون

ڪراچي پريس ڪلب ٻاهران جبري گمشدگين خلاف وائس فار مسنگ پرسنز آف سنڌ (وي ايم پي) پاران لڳايل احتجاجي ڪئمپ دوران ڪيترن ئي ڪارڪنن ۽ وڪيلن جي گرفتاري جون رپورٽون سامهون آيون آهن. مختلف ذريعن ۽ سوشل ميڊيا تي جاري بيانن موجب، پوليس ۽ سول ڪپڙن ۾ موجود اهلڪارن ڪارروائي ڪندي وي ايم پي سربراھ سورٺ لوهار، سندس ڌيءَ ڀومي، سينيئر وڪيل ايڊووڪيٽ پرويز آزاد، ايڊووڪيٽ شمس چانڊيو، مرڪ شر، امان بشيران زهراڻي ۽ فرمان زهراڻي سميت ٻين ڪارڪنن کي پنهنجي تحويل ۾ ورتو. شاهدن جو چوڻ آهي تہ احتجاجي ڪئمپ کي بہ ختم ڪيو ويو، جڏهن تہ ڪراچي پريس ڪلب مان کنڀيل ماڻهن جي موجودگي بابت واضح ڄاڻ نہ ملي سگھي. ٻئي پاسي، ڪجھ سياسي ۽ سماجي تنظيمن هن ڪارروائي جي مذمت ڪندي گرفتار ٿيل ماڻهن جي فوري آزادي جو مطالبو ڪيو آهي. اختيارين طرفان هن واقعي بابت باضابطہ موقف جاري ٿيڻ باقي آهي، جڏهن تہ صورتحال بابت وڌيڪ تفصيل سامهون اچڻ جو امڪان آهي.